Landsrecherche a haci dos detencion nobo awemainta den e investigacion di ladronicia, malversacion y/of heling di un of mas portofoon di Cuerpo Policial di Aruba.

Siman pasa Landsrecherche a detene tres sospechoso den cuadro di e investigacion ey. Dos di e sospechosonan aki a bay den libertad mientrastanto, pasobra nan detencion no tabata necesario mas pa e investigacion. Nan ta sigui como sospechoso den e investigacion. Landsrecherche a tuma varios radio di polis den beslag siman pasa.

Awe Landsrecherche a detene dos persona. Un di e sospechosonan aki ta traha na Cuerpo Policial di Aruba y a wordo suspendi siman pasa caba dor di su dunador di trabao (KPA) relaciona cu e investigacion. E ta wordo sospecha di ladronicia of malversacion di un of mas radio di polis.

E otro sospechoso di inicial N.A. ta traha pa un newssite. E investigacion a hiba pa loke ta e tambe pa sospecho di ladronicia of heling di un radio di polis. Ministerio Publico ta enfatiza cu e investigacion no ta dirigi su mes ningun momento riba su trabao como periodista, sino riba ladronicia of e uso illegal di propiedadnan di Cuerpo Policial di Aruba.

Investigacion ta sigui, segun Ministerio Publico.

Facebook Comments

Recommended Posts