Hof a dicta sentencia contra Polis cu a abusa di dama den patruya di Polis.

ORANJESTAD – Ayera Hof di Corte Superior a dicta sentencia den e apelacion di e agente di Polis B. contra su condena di 4 aña di prison. Telenoticia por a compronde cu Hof a haya B. culpabel di a abusa di un dama den un patruya di Polis y tambe cu e tabatin un cantidad di bala cayente na su cas. Ademas di a confirma e 4 aña di prison, Hof a pone acerca cu pa 9 aña largo, B. no por traha como Polis. 

Telenoticia aña pasa na Maart 2017, a informa cu Hues di Corte den Promer Instancia a aumenta e castigo contra e agente B. Fiscal a haya B. culpable cu riba 10 November 2016 a abusa di un dama, tabatin un cantidad di 60 bala cayente na su cas. Fiscal a exigi 3 aña y 6 luna di prison pero Hues a subi e castigo na 4 aña di prison.

SENTENCIA HOF

Telenoticia por a compronde cu ayera Hof di Corte Superior a dicta sentencia den e caso di apelacion di B. Hof ta haya B. culpabel di, siendo den uniform di Polis, a abusa di un dama den e patruya di Polis. Ademas Hof ta haya B. culpabel di tabatin 60 bala cayente. Hof a condena totalmente loke B. a haci y a confirma e 4 aña di prison di Corte den Promer Instancia. Mirando e seriedad di e caso, Hof a dicidi di pone mas castigo. Hof a prohibi B. pa durante 9 aña e no por traha como agente di Polis despues cu e sali for di prison. Cu e castigo hopi pisa aki, Hof ta mustra cu e ta condena totalmente loke e agente B. a haci.

Facebook Comments

Recommended Posts