Diabierna ultimo un biaha mas den Aruba Entertainment Center e pueblo di Aruba por a sigui e di dos anochi di Sparkling Tour 2009 y tambe atrabes di Telearuba.

E evento a cuminsa un poco despues di 9or di anochi debi na problemanan tecnico imprevisto y serio cu a sosode net prome cu Telearuba a bay live. Techniconan di Telearuba a hasi nan maximo esfuerso pa soluciona e problema pa asina toch e evento por a cuminsa unda cu  despues nos por a wak e participantenan subi escenario pa hasi nan presentacion.

Telearuba no por a presenta e intro di e show di e manera acostumbra  pero si a logra pa tur e participantenan haci nan presentacion. Nos ta gradici e publico y e televidente pa e pasenshi durante e evento.

Eliminacion durante e di dos anochi.

Durante e di dos anochi por a wak e emocion na momento cu tabata pasa pa patras di e scenario “backstage” caminda cada participante su bista tabata riba e flat screen pa wak si nan “movie song” ta aparece pa haya sa si nan a clasifica pa e siguiente buelta. Tabata tin un combinacion di alegria y tristesa. Tur e participantenan tabata prepara pa e proceso di eliminacion cu ta keda un parti dificil pero na mes momento e participantenan cu no a sigui a keda positivo y colegial pa cu e participantenan cu ta sigui. Patras di e scenario tur e participantenan a keda henter anochi hunto pa apoya y motiva otro.

Actividadnan di Sparkling Tour ta sigui

Durante e dianan nos dilanti actividadnan di Sparkling Tour ta sigui den full swing, lo cuminsa prepara pa e ultimo anochi, un biaha mas e parti di ensayonan lo tuma lugar.

E biaha aki e finalistanan mester prepara 2 cantica pa dia 09 di augustus proximo. Di e grupo di  finalistanan lo elimina 6 y 10 participante lo hasi nan presentacion. Despues for di e grupo di 10 un biaha mas 5 lo wordo elimina pa asina conoce e top 5 di Sparkling Tour 2009. E 5 participantenan cu yega e di 4 buelta lo mester presenta un biaha mas dilanti di e cuerpo di hurado, pa despues haya sa kende lo ta Aruba su next youth star pa aña 2009.

Tambe lo tin un dia caminda cu organisacion lo bay sali cu e participantenan y pasa un atardi relahante y placentero.

Premio grandi

E ganador of ganadora di Sparkling Tour 2009 lo ricibi 25.000 florin como premio. E prome finalista lo ricibi 4.000 florin, e segundo finalista lo ricibi 3.000 florin, e tercer finalista lo ricibi 2.000 florin y e di cuatra finalista 1.000 florin. Tur ta premio nan cu ta bale la pena pa e participantenan hasi nan maximo esfuerzo.

SMS voting

Corda vota pa bo artista favorito, manda un sms cu su number pa 1313. Y corda cumpra caarchi pa e gran final di Sparkling Tour 2009 na tur teleshop di Setar.

Sparkling Tour e evento den zomervakantie

Sparkling Tour ta keda un evento pa nos hobennan durante “zomervakantie”  cu ta stimula nan pa desarolla nan talento musical, descubri nan potencial, haya experiencia den “stage performance” cu un banda professional y forma parti di un evento grandi cu ta live. Tambe e pueblo di Aruba ta disfruta di e evento aki caminda nos hoben nan ta duna tur di nan mes pa por trese un show bunita pa dilanti. Prepara e popcorn pa e ultimo anochi!